അദ്ധ്യാപകര്‍ക്ക് ക്രിയാത്മക സമീപനം ആവശ്യം: കുഞ്ചെറിയ പി ഐസക്

കൊച്ചി:  അദ്ധ്യാപകര്‍ക്ക് ക്രിയാത്മക സമീപനം എല്ലാ വിഷയങ്ങളിലും ആവശ്യമാണെന്നും, ഇത് വളര്‍ന്നു വരുന്ന തലമുറയ്ക്ക് പുത്തന്‍ കാഴ്ചപ്പാടുകള്‍ നല്‍കുതിന് ഉപകരിക്കുമെന്നും എപിജെ അബ്ദുള്‍കലാം ടെക്‌നോളജിക്കല്‍ യൂണിവേഴ്‌സിറ്റി വൈസ് ചാന്‍സിലര്‍ ഡോ. കുഞ്ചെറിയ പി ഐസക് പറഞ്ഞു. എപിജെഎകെ ടെക്‌നോളജിക്കല്‍ യൂണിവേഴ്‌സിറ്റിയുംഫിസാറ്റ് സെന്റര്‍ ഫോര്‍ ഇവേഷന്‍ ഇന്‍ക്യൂമ്പേഷന്‍ ഓണ്‍ട്രപ്രണര്‍ഷിപ്പും സംയുക്തമായി അങ്കമാലി ഫിസാറ്റ് എഞ്ചിനീയറിംഗ് കോളേജില്‍ അദ്ധ്യാപകര്‍ക്കായുള്ള സംസ്ഥാനതല ത്രിദിന ശില്‍പശാല ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. വിദ്യാര്‍ത്ഥികളില്‍ ക്രിയാത്മകതയും പുത്തനാശയങ്ങളോടുള്ള അഭിനിവേശവും  രൂപപ്പെടുത്തുന്നതിന് അദ്ധ്യാപകര്‍ക്ക് ശക്തമായ ഉത്തരവാദിത്വമുണ്ട്. വിവര സാങ്കേതിക വിദ്യയില്‍ വിദ്യാര്‍ത്ഥികള്‍ പിന്നാക്കം പോകുന്നുണ്ടെങ്കില്‍ ഒരു പരിധിവരെ അദ്ധ്യാപകരും ഇതിന് ഉത്തരവാദികളാണ്. അതിനാല്‍ അറിവിലും വിജ്ഞാനത്തിലും അദ്ധ്യാപകരുടെ നവീകരണം വിദ്യാര്‍ത്ഥികള്‍ക്ക്  ഏറെ ഗുണകരമാണെന്നും അദ്ദേഹം ചൂണ്ടിക്കാട്ടി. ചടങ്ങില്‍ ഫിസാറ്റ് എഞ്ചിനീയറിംഗ് കോളേജ് ചെയര്‍മാന്‍ പോള്‍ മുണ്ടാടന്‍ അദ്ധ്യക്ഷത വഹിച്ചു.

ചടങ്ങില്‍ കോളേജ് വൈസ് ചെയര്‍മാന്‍ ആന്റണി ജോസ്, പ്രിന്‍സിപ്പല്‍ ഡോ. ജോര്‍ജ്ജ് ഐസക്ക്, സംസ്ഥാന എന്‍ എസ് എസ് പ്രോഗ്രാം കോ-ഓര്‍ഡിനേറ്റര്‍ അബ്ദുള്‍ ജബ്ബാര്‍ അഹമ്മദ്, കോളേജ് വൈസ് പ്രിന്‍സിപ്പല്‍ ഡോ. സി. ഷീല, അക്കാദമിക്ക് ഡയറക്ടര്‍ ഡോ. കെ. എസ്. എം. പണിക്കര്‍, ഡീന്‍ ഡോ. സണ്ണി കുര്യാക്കോസ് ഡോ. ജോര്‍ജ്ജ് വി. ആന്റണി, രേണു ജി തുടങ്ങിയവര്‍ സംസാരിച്ചു. ഫിസാറ്റ് സെന്റര്‍ ഫോര്‍ ഇന്നവേഷന്‍ ഇന്‍ക്യൂമ്പേഷന്‍ ആന്റ് ഓണ്‍ട്രപ്രണര്‍ഷിപ്പ് ഡെവലപ്‌മെന്റ് സെല്‍ നോഡല്‍ ഓഫീസര്‍ ജിബി വര്‍ഗ്ഗീസ്, ഫെഡറല്‍ ബാങ്ക് എ ജി എം. കെ പി സണ്ണി, എന്നിവര്‍ സംസാരിച്ചു. ഹൈക്കണ്‍ ഗ്രൂപ്പ് ഓഫ് കമ്പനീസ് ചെയര്‍മാന്‍ & മാനേനിംഗ് ഡയറക്ടര്‍ ക്രിസ്റ്റോ ജോര്‍ജ്, നാഷണല്‍ സര്‍വ്വീസ് സ്‌കീം ടെക്‌നിക്കല്‍ കണ്‍സള്‍ട്ടന്റ് ഡോ. നിസാം റഹ്മാന്‍ തുടങ്ങിയവര്‍ ക്ലാസ് നയിച്ചു.  അദ്ധ്യാപകരായ ജിബി വര്‍ഗ്ഗീസ്, ടോം ആന്റോ, കെ ആര്‍ ശ്രീജിത്ത്  തുടങ്ങിയവര്‍ പരിപാടികള്‍ക്ക് നേതൃത്വം നല്‍കി 

സംരംഭകത്വ താല്‍പര്യമുള്ള അദ്ധ്യാപകരിലൂടെ വിദ്യാര്‍ത്ഥികള്‍ക്ക് പുതിയ ഉല്‍പ്പന്നങ്ങള്‍ രൂപപ്പെടുത്തുന്നതിന് ശില്‍പശാല അവസരമൊരുക്കും. ക്ലാസുകളില്‍ അദ്ധ്യാപകര്‍ പഠിപ്പിക്കുന്ന വിഷയങ്ങളുടെ സാമൂഹ്യ ആവശ്യങ്ങളും  സാഹചര്യങ്ങളും തിരിച്ചറിഞ്ഞ് അതാതു വിഷയങ്ങളില്‍ പ്രായോഗിക പരിശീലനം നല്‍കുകയാണ്  ഇതിലൂടെ ലക്ഷ്യം വയ്ക്കുന്നത്. യൂണിവേഴ്‌സിറ്റിയുടെ കീഴിലുള്ള ഓരോ കോളേജില്‍ നിന്നും സംരഭകത്വ താല്‍പര്യമുള്ള ഓരോ അദ്ധ്യാപകരെയാണ് ഇതിനായി തിരഞ്ഞെടുത്തിരിക്കുന്നത്. ശില്‍പശാലയില്‍ ഇലക്‌ട്രോണിക്‌സ്, എംബഡഡ് സിസ്റ്റം ഡിസൈന്‍, പി സി ബി ഡിസൈന്‍, കാഡ്,  ത്രീഡി പ്രിന്റിംഗ് തുടങ്ങിയ വിവിധ മേഖലകളില്‍ പ്രാഥമികതല പരിശീലനം നല്‍കിക്കൊണ്ട് ഒരു ഉല്‍പ്പന്നം നിര്‍മ്മിക്കുന്നതിനാവശ്യമായ വിവിധ മേഖലകളില്‍ ഓരോ അദ്ധ്യാപകര്‍ക്കും പരിശീലനം നല്‍കി. പത്തുദിവസം സമയം ഇവര്‍ക്ക് ഇവരുടെ ഉല്‍പ്പന്നത്തെക്കുറിച്ച് ചിന്തിക്കുന്നതിനും അവ രൂപപ്പെടുത്തുന്നതിനും അവസരം നല്‍കിയശേഷം ഒക്‌ടോബര്‍ 22 ന് അവര്‍ രൂപപ്പെടുത്തിയ ഉല്‍പ്പന്നങ്ങളുടെ പ്രദര്‍ശനം ഫിസാറ്റില്‍ സംഘടിപ്പിക്കുമെന്നും എഐസിടിഇ മെംബര്‍ സെക്രട്ടറി പ്രൊഫ. എ പി മിത്തല്‍, ഡയറക്ടര്‍മാരായ ഡോ. മന്‍പ്രീത് സിംഗ് മന്ന, ഡോ. രമേഷ് എന്നിവര്‍ പങ്കെടുക്കുമെന്നും എപിജെ അബ്ദുള്‍കലാം ടെക്‌നോളജിക്കല്‍ യൂണിവേഴ്‌സിറ്റി പ്രോ വൈസ് ചാന്‍സിലര്‍ ഡോ. എം. അബ്ദുള്‍ റഹ്മാന്‍ അറിയിച്ചു.

(48 -10)

കുഫോസില്‍ അദ്ധ്യാപകരുടെ ഒഴിവ്

കൊച്ചി:  കേരള ഫിഷറീസ് സമുദ്രപഠന സര്‍വ്വകലാശാലയില്‍ ഡെപ്യൂട്ടേഷന്‍ അടിസ്ഥാനത്തില്‍ പ്രൊഫസര്‍മാരുടെ രണ്ടും, അസ്സോസിയേറ്റ് പ്രൊഫസര്‍മാരുടെ ഏഴും, കരാര്‍ അടിസ്ഥാനത്തില്‍ അസിസ്റ്റന്റ് പ്രൊഫസര്‍മാരുടെ പതിനഞ്ചും  ഒഴിവുകള്‍ വീതമുണ്ട്.  താത്പര്യമുള്ളവര്‍ ബയോ ഡാറ്റയും അനുബന്ധ സര്‍ട്ടിഫിക്കറ്റുകളും സഹിതം അപേക്ഷിക്കുക. കൂടുതല്‍ വിവരങ്ങള്‍ക്ക് കുഫോസ് വെബ് സൈറ്റായ www.kufos.ac.in സന്ദര്‍ശിക്കുക.  

(49 -10)

ഭാഗ്യക്കുറി ക്ഷേമനിധി ബോര്‍ഡ്

2016 വര്‍ഷത്തെ വിദ്യാഭ്യാസ അവാര്‍ഡിന് അപേക്ഷിക്കാം

കൊച്ചി:  എസ്.എസ്.എല്‍.സി, ടി.എച്ച്.എസ്.എല്‍.സി, എച്ച്.എസ്.ഇ, വി.എച്ച്.എസ്.ഇ എന്നീ വിഭാഗങ്ങളിലായി ഉയര്‍ന്ന മാര്‍ക്ക് വാങ്ങിയ ലോട്ടറി ക്ഷേമനിധി അംഗങ്ങളുടെ മക്കള്‍ക്ക് ഒന്ന്, രണ്ട്, മൂന്ന് സ്ഥാനങ്ങളിലായി യഥാക്രമം 2000, 1500, 1000 രൂപ വീതം വിദ്യാഭ്യാസ അവാര്‍ഡ് ജില്ലാതലത്തില്‍ വിതരണം ചെയ്യാന്‍ തീരുമാനിച്ചു. അപേക്ഷാ ഫാറം ജില്ലാ ലോട്ടറി വെല്‍ഫയര്‍ ഓഫീസില്‍ നിന്നും ലഭിക്കും. പൂരിപ്പിച്ച അപേക്ഷകള്‍ ഗസറ്റഡ് ഓഫീസര്‍ സാക്ഷ്യപ്പെടുത്തിയ മാര്‍ക്ക് ലിസ്റ്റിന്റെ പകര്‍പ്പ് സഹിതം നവംബര്‍ അഞ്ചിന് മുമ്പായി ജില്ലാ ലോട്ടറി ക്ഷേമനിധി ഓഫീസില്‍ സമര്‍പ്പിക്കണം.

(50 -10)

സ്‌കൂള്‍, കോളേജ് വാഹനങ്ങള്‍ പരിശോധനയ്ക്ക് വിധേയമാക്കണം

 കൊച്ചി: സ്‌കൂള്‍, കോളേജ് വാഹനങ്ങള്‍ അപകടത്തില്‍പ്പെടുന്നത് വര്‍ധിച്ചുവരുന്ന സാഹചര്യത്തില്‍ എറണാകുളം റീജണല്‍ ട്രാന്‍സ്‌പോര്‍ട്ട് ഓഫീസിനു കീഴില്‍ മൂന്നുവര്‍ഷത്തിലധികം പഴക്കമുള്ള എല്ലാ സ്‌കൂള്‍, കോളേജ് വാഹനങ്ങളും ഒക്‌ടോബര്‍ 15ന് രാവിലെ ഏഴുമുതല്‍ 9.30വരെ കാക്കനാട് ഇന്‍ഫോപാര്‍ക്ക് റോഡില്‍ ക്ഷമതാ പരിശോധനയില്‍ നിര്‍ബന്ധമായും ഹാജരാക്കണമെന്ന് ആര്‍ടിഒ പി. എച്ച്. സാദിക്ക് അലി അറിയിച്ചു. ഏതെങ്കിലും സാഹചര്യത്തില്‍ അന്നേദിനം ഹാജരാക്കാന്‍ കഴിയാത്ത വാഹനങ്ങള്‍ ഒക്‌ടോബര്‍ 19ന് രാവിലെ 9ന് കൊണ്ടുവരേണ്ടതാണ്. 

(51 -10)

പാര്‍ട്‌ടൈം സ്വീപ്പര്‍മാരുടെ സീനിയോറിറ്റി പട്ടിക

 കൊച്ചി: ജില്ലയിലെ വിവിധ വകുപ്പുകളില്‍ ജോലി ചെയ്തുവരുന്ന പാര്‍ട്ട്‌ടൈം സ്വീപ്പര്‍മാരുടെ ജില്ലാതല സീനിയോറിറ്റി പട്ടിക ഇനിയും ഹാജരാകാത്ത വകുപ്പ്, ഓഫീസ് മേധാവികള്‍ ഒക്‌ടോബര്‍ 15നകം കളക്ടറേറ്റില്‍ സമര്‍പ്പിക്കണമെന്ന് ഡെപ്യൂട്ടി കളക്ടര്‍( ജനറല്‍) അറിയിച്ചു.

(52 -10)