കൊച്ചി: അടിസ്ഥാന സൗകര്യ
വികസനത്തിനാവശ്യമായ മൂലധനം സമാഹരിക്കാന്‍ നൂതനമായ പൊതുഇടപെടല്‍ അനിവാര്യമാണെന്ന്‌
ആസൂത്രണ ബോര്‍ഡ്‌ വൈസ്‌ ചെയര്‍മാന്‍ ഡോ. വി.കെ. രാമചന്ദ്രന്‍.
സാമ്പത്തികവളര്‍ച്ചയുടെ എല്ലാ മേഖലകളിലും പ്രാദേശിക സാധ്യതകളെയും ഉറവിടങ്ങളെയും
കുറിച്ച്‌ അവബോധമുണ്ടാകണം. കിഫ്‌ബിയും കേരള ബാങ്കും പോലുള്ള നിര്‍ദേശങ്ങള്‍ മൂലധന
സമാഹരണത്തിന്‌ പുതിയ പാത തുറക്കുമെന്നും അദ്ദേഹം അഭിപ്രായപ്പെട്ടു.
സുസ്ഥിര
ഭക്ഷ്യസുരക്ഷാ പരിപാടി സംബന്ധിച്ച്‌ ഇ.എം.എസ്‌ പഠന ഗവേഷണ കേന്ദ്രം സംഘടിപ്പിച്ച
ഏകദിന ശില്‍പ്പശാല ഉദ്ഘാടനം ചെയ്യുകയായിരുന്നു ഡോ. വി.കെ.
രാമചന്ദ്രന്‍.
ജനാധിപത്യവും മതനിരപേക്ഷതയും വെല്ലുവിളി നേരിടുന്ന ഘട്ടത്തില്‍
രാജ്യമൊട്ടാകെയുള്ള ജനങ്ങള്‍ കേരളത്തിലെ സര്‍ക്കാരിലും ജനങ്ങളിലും ഏറെ
പ്രതീക്ഷയര്‍പ്പിക്കുന്നുണ്ട്‌. ചരിത്രപരമായി കേരളം നേടിയെടുത്ത നേട്ടങ്ങള്‍
സംരക്ഷിക്കപ്പെടുമെന്നും സമൂഹത്തിലെ പിന്നണിയിലുള്ളവര്‍ക്ക്‌
ആശ്വാസമെത്തിക്കാനാകുമെന്നും അവര്‍ കരുതുന്നു. സാമൂഹ്യ സാമ്പത്തിക വികസനത്തിനായുള്ള
ജനാധിപത്യ മതേതര ഇടതുപക്ഷ ബദലിനായി രാജ്യം ഉറ്റുനോക്കുന്നതും കേരളത്തെയാണ്‌. ആ
വിശ്വാസത്തെ ബഹുമാനിക്കേണ്ടത്‌ കേരളത്തിന്റെ കര്‍ത്തവ്യവും കടമയുമാണെന്ന്‌ അദ്ദേഹം
പറഞ്ഞു.
രാജ്യത്തെ മറ്റ്‌ സംസ്ഥാനങ്ങള്‍ കേന്ദ്ര നിര്‍ദേശ പ്രകാരം പഞ്ചവത്സര
പദ്ധതികള്‍ ഉപേക്ഷിച്ച ഘട്ടത്തില്‍ കേരളം ഇതുമായി മുന്നോട്ടു പോകാന്‍ സധൈര്യം
തീരുമാനമെടുത്തിരിക്കുകയാണ്‌. അടുത്ത പദ്ധതിക്കുള്ള പ്രവര്‍ത്തനങ്ങള്‍
തുടങ്ങിക്കഴിഞ്ഞു. കേരള മാതൃകയുടെ ആണിക്കല്ലായ സാമൂഹിക നിക്ഷേപം തുടരുന്നതിന്റെ
ഭാഗമായാണ്‌ ആരോഗ്യം, വിദ്യാഭ്യാസം, പാര്‍പ്പിടം, ഹരിതകേരളം എന്നീ മേഖലകളിലായി നാലു
മിഷനുകള്‍ സര്‍ക്കാര്‍ പ്രഖ്യാപിച്ചതെന്നും അദ്ദേഹം ചൂണ്ടിക്കാട്ടി.
മുന്‍ എം.പി
പി. രാജീവ്‌ അധ്യക്ഷത വഹിച്ചു. ഇ.എം.എസ്‌ പഠന ഗവേഷണ കേന്ദ്രം സെക്രട്ടറി സി.എം.
ദിനേശ്‌ മണി, ഡോ. എന്‍. രമാകാന്തന്‍, പള്ളിയാക്കല്‍ സര്‍വീസ്‌ സഹകരണ ബാങ്ക്‌
സെക്രട്ടറി എം.പി. വിജയന്‍, ജൈവ കൃഷി ജില്ലാ കോ ഓഡിനേറ്റര്‍ എം.എം അബ്ബാസ്‌,
സീനിയര്‍ വെറ്ററിനറി സര്‍ജന്‍ ഡോ. എം.എസ്‌. അഷ്‌കര്‍, ഫിഷറീസ്‌ ഡപ്യൂട്ടി ഡയറക്ടര്‍
എസ്‌. മഹേഷ്‌, ക്ഷീര വികസന വകുപ്പ് അസിസ്റ്റന്റ്‌ ഡയറക്ടര്‍ അബ്ദുള്‍ കബീര്‍
തുടങ്ങിയവര്‍ സംസാരിച്ചു.
Comments
Post a Comment