മൂവാറ്റുപുഴ: സംസ്ഥാന സര്‍ക്കാരിന്റെ തീരുമാനപ്രകാരം, ക്ഷീരവികസന വകുപ്പ് നവംബര്‍ 26 സംസ്ഥാന ഫോഡര്‍ദിനമായി ആചരിക്കുകയാണ്. ആയതിന്റെ ഭാഗമായി എറണാകുളം ജില്ല ഫോഡര്‍ദിനം മൂവാറ്റുപുഴ ബ്ലോക്കിലെ കാലാമ്പൂര്‍ ക്ഷീരസഹകരണ സംഘത്തില്‍ നടന്നു. എല്‍ദോ എബ്രഹാം എം.എല്‍.എ.ഉദ്ഘാടനം ചെയ്തു. ജില്ലാ പഞ്ചായത്ത് വൈസ് പ്രസിഡന്റ് അഡ്വ. അബ്ദുള്‍ മുത്തലിബ് അദ്ധ്യക്ഷതവഹിച്ചു. ജില്ലയിലെ മികച്ച ഗോപാലിക ഗ്രൂപ്പിന് മുന്‍ എം.എല്‍.എ.ജോസഫ് വാഴയ്ക്കന്‍ അവാര്‍ഡ് നല്‍കി ആദരിച്ചു. തന്‍വര്‍ഷത്തെ ഗോപാലിക ഗ്രൂപ്പിനുള്ള ധനസഹായം കോതമംഗലം ബ്ലോക്കിലെ ആവോലിച്ചാല്‍ ക്ഷീരസംഘത്തിന്റെ നേതൃത്വത്തില്‍ പ്രവര്‍ത്തിക്കുന്ന സൂര്യഗോപാലിക ഗ്രൂപ്പിനുള്ള ധനസഹായവും വിതരണം ചെയ്തു. തീറ്റപ്പുല്‍കടകളുടെ വിതരണോത്ഘാടനം ആയവന പഞ്ചായത്ത് പ്രസിഡന്റ് സാബു വള്ളോംകുന്നേല്‍ നിര്‍വ്വഹിച്ചു. അസോള കിറ്റുകളുടെ വിതരണം മേഖല യൂണിയന്‍ ബോര്‍ഡ് മെമ്പര്‍ ലിസി സ്റ്റീഫന്‍ നിര്‍വ്വഹിച്ചു. സുബാബുള്‍ വൃക്ഷവിളകളുടെ നേഴ്‌സറി തൈകളുടെ വിതരണം ആയവന ഗ്രാമപഞ്ചായത്ത് മെമ്പര്‍ സിന്ധു ബെന്നി നിര്‍വ്വഹിച്ചു. കോതമംഗലം നഗരസഭഅംഗം മഞ്ജു തോമസ്, സുഭാഷ് കടയ്‌ക്കോട്, വി.എം. ജോര്‍ജ്ജ്, മര്‍ക്കോസ് ഉലഹന്നാന്‍ തുടങ്ങിയവര്‍ പ്രസംഗിച്ചു. പദ്ധതി വിശദീകരണം ക്ഷീരവികസന വകുപ്പ് ഡെപ്യൂട്ടി ഡയറക്ടര്‍ ജോസ് ജേക്കബ് നിര്‍വ്വഹിച്ചു. യോഗത്തിന് കാലാമ്പൂര്‍ ക്ഷീരോത്പാദക സഹകരണസംഘം പ്രസിഡന്റ്, മേഖലാ യൂണിയന്‍, ക്ഷീരകര്‍ഷക ക്ഷേമനിധി ബോര്‍ഡ് അംഗവുമായ ജോണ്‍ തെരുവത്ത് സ്വാഗതവും മൂവാറ്റുപുഴ ഡയറിഫാം ഇന്‍സ്ട്രക്റ്റര്‍ സുജിത് പി. രാഘവന്‍ നന്ദിയും പ്രകാശിപ്പിച്ചു. ഫോഡര്‍ ദിനത്തോട് അനുബന്ധിച്ചുള്ള സെമിനാറില്‍ അസി.ഡയറക്ടര്‍ സില്‍വി മാത്യു മോഡറേറ്ററായിരുന്നു. സെമിനാറില്‍ ജില്ലാ ക്വാളിറ്റി കണ്‍ട്രോള്‍ ഓഫീസര്‍ ശാലിനി ഗോപിനാഥ്, സീനിയര്‍ ഡയറി എക്സ്റ്റന്‍ഷന്‍ ഓഫീസര്‍ എം.എം. അബ്ദുള്‍ കബീര്‍, മൂവാറ്റുപുഴ ക്ഷീരവികസന ഓഫീസര്‍ കെ. പൗലോസ് എന്നിവര്‍ വിഷയാവതരണം നടത്തി.
Comments
Post a Comment