കൊച്ചി: പാര്‍ക്കിങ്‌ സൗകര്യമേര്‍പ്പെടുത്തിയതിലെ അപര്യാപ്‌തതകള്‍ പരിഹരിക്കണമെന്നാവശ്യപ്പെട്ട്‌ കൊച്ചി തുറമുഖത്തെ കണ്ടെയ്‌നര്‍ ട്രെയിലര്‍ ലോറികള്‍ ഡിസംബര്‍ അഞ്ചു മുതല്‍ നടത്താനിരുന്ന സമരം ജില്ലാ കളക്ടറുമായി നടത്തിയ ചര്‍ച്ചയെ തുടര്ന്ന് പിന്‍വലിച്ചു. വല്ലാര്‍പാടത്ത്‌ ഭാരത്‌ പെട്രോളിയം കോര്‍പ്പറേഷന്റെ കൈവശമുള്ള സ്ഥലത്ത്‌ നാല്‌ ഏക്കറില്‍ ജനുവരി 26നകം പാര്‍ക്കിങ്‌ സൗകര്യമൊരുക്കുമെന്ന്‌ തൊഴിലാളി യൂണിയന്‍ കോ ഓഡിനേഷന്‍ കമ്മിറ്റിയുമായി നടത്തിയ ചര്‍ച്ചയില്‍ കളക്ടര്‍ മുഹമ്മദ് വൈ സഫിറുള്ള ഉറപ്പ്‌ നല്‍കിയതിനെ തുടര്‍ന്നാണ്‌ സമരം പിന്‍വലിച്ചത്‌.
ഭാരത്‌ പെട്രോളിയം കോര്‍പ്പറേഷന്റെ സ്ഥലത്ത്‌ യാര്‍ഡ്‌ നിര്‍മാണം പൂര്‍ത്തിയാകുന്നത്‌ വരെ വല്ലാര്‍പാടത്ത്‌ അര്‍പ്പിത യാര്‍ഡില്‍ 60 ട്രെയിലറുകള്‍ക്ക്‌ ടോളില്ലാതെ പാര്‍ക്കിങിന്‌ സൗകര്യമൊരുക്കാനും യോഗത്തില്‍ തീരുമാനമായി. വല്ലാര്‍പാടം കണ്ടെയ്‌നര്‍ ടെര്‍മിനലിന്‌ സമീപം പ്രത്യേക സാമ്പത്തികമേഖലയില്‍ പത്ത്‌ ഏക്കര്‍ സ്ഥലം പാര്‍ക്കിങിനായി നല്‍കുമെന്ന്‌ കൊച്ചി തുറമുഖ ട്രസ്റ്റ്‌ സെക്രട്ടറി ഗൗരി.എസ്‌.നായരും വ്യക്തമാക്കി. ഏപ്രിലിനകം ഇതിനുള്ള നടപടികള്‍ പൂര്‍ത്തീകരിക്കും. തുറമുഖ വകുപ്പ് മന്ത്രിയുടെ സാന്നിധ്യത്തില്‍ അടുത്ത മാസം പകുതിയോടെ ആലോചനായോഗം വിളിച്ച്‌ ഇപ്പോള്‍ സ്വീകരിച്ചിട്ടുള്ള നടപടികള്‍ വിലയിരുത്തുമെന്നും കളക്ടര്‍ പറഞ്ഞു.
അഡീഷണല്‍ ജില്ലാ മജിസ്‌ട്രേറ്റ്‌ സി.കെ. പ്രകാശ്‌, തുറമുഖ ട്രസ്റ്റ്‌ ട്രാഫിക്‌ മാനേജര്‍ ജിമ്മി ജോര്‍ജ്‌, ഡിപി വേള്‍ഡ്‌ എച്ച്‌ആര്‍ വിഭാഗം മാനേജര്‍ ഗിരീഷ് മേനോന്‍, തൊഴിലാളി യൂണിയന്‍ കോ ഓഡിനേഷന്‍ കമ്മിറ്റി ഭാരവാഹികളായ ചാള്‍സ്‌ ജോര്‍ജ്‌, എം. ജമാല്‍കുഞ്ഞ്‌, വി.യു. ഹംസക്കോയ, അഡ്വ. സാനി, ജോസഫ്‌ സേവ്യര്‍, ട്രക്ക്‌ ഉടമ സംഘം ഭാരവാഹികളായ ടോണി തോമസ്‌, ടി.കെ. സജീവ്‌ എന്നിവരും യോഗത്തില്‍ പങ്കെടുത്തു.
Comments
Post a Comment