ഗ്രാമപഞ്ചായത്തംഗത്തെ അധിക്ഷേപിച്ച കേസില്‍ പോലീസ് നടപടി

കൊച്ചി: കടമക്കുടി ഗ്രാമപഞ്ചായത്തംഗം എം.എഫ് പ്രസാദിനെ അധിക്ഷേപിക്കുകയും ബൈക്ക് നശിപ്പിക്കുകയും ചെയ്തവര്‍ക്കെതിരേ കുറ്റപത്ര  കോടതിയില്‍ പോലീസ് സംസ്ഥാന ന്യൂനപക്ഷ മുമ്പാകെ അറിയിച്ചു. ഇന്നലെ കളക്ടറേറ്റ് സമ്മേളന ഹാളില്‍ ചെയര്‍മാന്‍ പി. കെ. ഹനീഫയുടെ അധ്യക്ഷതയില്‍ ചേര്‍ന്ന കമ്മീഷന്‍ സിറ്റിംഗിലാണ് കേസ് പരിഗണനയ്‌ക്കെടുത്തത്. കമ്മീഷനംഗം അഡ്വ. ബിന്ദു എം. തോമസും പങ്കെടുത്തു. ഗ്രാമപഞ്ചായത്ത് തെരഞ്ഞെടുപ്പിനുശേഷമുണ്ടായ സംഭവങ്ങളാണ് കേസില്‍ കലാശിച്ചത്. രണ്ടുപേര്‍ ചേര്‍ന്ന് പ്രസാദിനെ അധിക്ഷേപിക്കുകയും ബൈക്ക് നശിപ്പിക്കുകയും ചെയ്തു. തുടര്‍ന്ന് പ്രസാദ് കമ്മീഷനില്‍ പരാതി നല്‍കിയതിനെതുടര്‍ന്ന് കേസെടുക്കാന്‍ പോലീസിനു നിര്‍ദേശം നല്‍കിയിരുന്നു. 

  പ്രാര്‍ഥനാലയം നിര്‍മിക്കാന്‍ സമ്മതിക്കുന്നില്ലെന്നു കാട്ടി കോടനാട് ഹൈലാന്‍ഡ് ഇമ്മാനുവല്‍ ചര്‍ച്ച് പ്രതിനിധികള്‍ സമര്‍പ്പിച്ച പരാതിയില്‍ കമ്മീഷന്‍ നേരിട്ട് സ്ഥലം സന്ദര്‍ശിക്കാന്‍ തീരുമാനിച്ചു. ഈ വിഷയത്തില്‍ എതിര്‍പ്പുള്ളവരുമായി ചര്‍ച്ചനടത്തുമെന്ന് ചെയര്‍മാന്‍ അറിയിച്ചു. 

  ഞാറയ്ക്കല്‍ പോലീസ് സ്റ്റേഷന്‍ പരിധിയിലെ നായരമ്പലത്ത് കോണ്‍ക്രീറ്റ് വാള്‍ട്ട് സെമിത്തേരി നിര്‍മിക്കുന്നതില്‍ നിലനില്‍ക്കുന്നതിലെ പ്രശ്‌നങ്ങള്‍ പരിഹരിക്കുന്നതിന് പോലീസിന്റെ സാന്നിധ്യത്തില്‍ ബന്ധപ്പെട്ടവരുടെ യോഗം വിളിച്ചുകൂട്ടി ചര്‍ച്ച നടത്താനും കമ്മീഷന്‍ തീരുമാനിച്ചു. 

  ഇന്നലെ സിറ്റിംഗില്‍ 21 കേസുകളാണ് പരിഗണനക്കെടുത്തത്. ഇതില്‍ ഒരു കേസ് തീര്‍പ്പായി. അടുത്ത സിറ്റിംഗ് ഏപ്രില്‍ 12 ന് കളക്ടറേറ്റ് സമ്മേളന ഹാളില്‍ നടത്തും. 

ഐഒസി പാചകവാതക പ്ലാന്റ് സമരം തീര്‍പ്പായില്ല

  കൊച്ചി: ഉദയംപേരൂര്‍ ഇന്ത്യന്‍ ഓയില്‍ കോര്‍പറേഷന്‍ പ്ലാന്റില്‍ യൂണിയനുകള്‍ നടത്തിവരുന്ന സമരം തീര്‍ക്കാന്‍ ഇന്നലെ ജില്ലാ കളക്ടര്‍ മുഹമ്മദ് വൈ. സഫീറുള്ളയുടെ അധ്യക്ഷതയില്‍ വിളിച്ചുചേര്‍ത്ത യോഗത്തില്‍ തീരുമാനമായില്ല. പ്ലാന്റില്‍ ആംബുലന്‍സ് സൗകര്യം ഏര്‍പ്പെടുത്തണമെന്നാവശ്യപ്പെട്ടാണ് വിവിധ യൂണിയനുകള്‍ ദിവസങ്ങള്‍ക്കു മുമ്പ് സമരം ആരംഭിച്ചത്. നിലവില്‍ പ്ലാന്റില്‍ ആംബുലന്‍സ് സൗകര്യമില്ല. പകരം അവശ്യസമയത്ത് ഉപയോഗിക്കാന്‍ ഒരു കാര്‍ ആണുള്ളത്. മൂന്നുമാസത്തിനുള്ളില്‍ ഇ-ടെന്‍ഡര്‍ പൂര്‍ത്തിയാക്കി ആംബുലന്‍സ് സൗകര്യം ഏര്‍പ്പെടുത്താമെന്നു മാനേജ്‌മെന്റ് അറിയിച്ചതായി ജില്ലാ കളക്ടര്‍ വ്യക്തമാക്കി. എന്നാല്‍ ഇക്കാലയളവു വരെ താത്കാലികമായി പൂര്‍ണസൗകര്യങ്ങളോടു കൂടിയ ആംബുലന്‍സ് വേണമെന്ന നിലപാടില്‍ യൂണിയനുകള്‍ ഉറച്ചുനില്‍ക്കുകയാണ്. സ്ഥിരം സംവിധാനം ആകുന്നതുവരെ നിലവിലുള്ള കാര്‍ സംവിധാനം മറ്റ് ആവശ്യങ്ങള്‍ക്ക് ഉപയോഗിക്കരുതെന്നു ജില്ലാ കളക്ടര്‍ നിര്‍ദേശം നല്‍കിയിട്ടുണ്ട്. രമ്യമായ പരിഹാരത്തിന് കൂടുതല്‍ ചര്‍ച്ച നടത്താനും സമരത്തിന്റെ പേരില്‍ പൊതുജനങ്ങളെ ബുദ്ധിമുട്ടിക്കാന്‍ പാടില്ലെന്നും ജില്ലാ കളക്ടര്‍ വ്യക്തമാക്കി. 

ഈ മാസത്തെ റേഷന്‍ വിഹിതം

  കൊച്ചി: ഈമാസത്തെ റേഷന്‍ വിഹിതം: അന്ത്യോദയ അന്നയോജന വിഭാഗത്തിന് 28 കിലോ അരിയും ഏഴുകിലോ ഗോതമ്പും. മുന്‍ഗണന വിഭാഗക്കാര്‍ക്ക് ഒാരോ അംഗത്തിനും നാലുകിലോ അരിയും ഒരുകിലോ ഗോതമ്പും. മുന്‍ഗണനേതര സബ്‌സിഡി വിഭാഗത്തിന് രണ്ടു രൂപ നിരക്കില്‍ ഒാരോ അംഗത്തിനും രണ്ടു കിലോ അരി. മുന്‍ഗണനേതര സബ്‌സിഡി രഹിത വിഭാഗത്തിന് ആറുകിലോ അരിയും ഗോതമ്പും അരിക്ക് കിലോ 8.90 രൂപ നിരക്കിലും ഗോതമ്പ് കിലോ 6.70 രൂപ നിരക്കിലും. വൈദ്യുതിയുള്ള കാര്‍ഡുകള്‍ക്ക് അരലിറ്റര്‍ വീതവും വൈദ്യുതിയില്ലാത്ത കാര്‍ഡുകള്‍ക്ക് നാലുലിറ്റര്‍ വീതവും മണ്ണെണ്ണ എന്നിവ ലഭിക്കും.