കൊച്ചി: നൂറു കുളങ്ങള്‍ അമ്പതു ദിവസത്തിനുള്ളില്‍ പുനരുജ്ജീവിപ്പിക്കാന്‍ ജില്ലാഭരണകൂടം. കൊച്ചിന്‍ ഷിപ് യാര്‍ഡുമായി ചേര്‍ന്ന് നടപ്പാക്കുന്ന പദ്ധതി എപ്രില്‍ 2 മുതല്‍ ആരംഭിക്കും. എറണാകുളം ഫൈന്‍ ആര്‍ട്‌സ് ഹാളില്‍ പദ്ധതിയുടെ പ്രഖ്യാപനയോഗം ജില്ലാ പഞ്ചായത്ത് പ്രസിഡണ്ട് ആശാ സനില്‍ ഉദ്ഘാടനം ചെയ്തു. ജില്ലയിലെ എല്ലാ തദ്ദേശഭരണസ്ഥാപനങ്ങളിലും നടപ്പാക്കുന്ന പദ്ധതി വരള്‍ച്ചയെ ഫലപ്രദമായി നേരിടാന്‍ സഹായിക്കുമെന്ന് ജില്ലാ പഞ്ചായത്ത് പ്രസിഡണ്ട് പറഞ്ഞു. വിവിധ തദ്ദേശസ്വയംഭരണസ്ഥാപനങ്ങള്‍ ജലദൗര്‍ലഭ്യം നേരിടാന്‍ ഇപ്പോള്‍ തന്നെ ബുദ്ധിമുട്ടനുഭവിക്കുന്നുണ്ട്. വരും മാസങ്ങളില്‍ വരള്‍ച്ച രൂക്ഷമാകും. ലഭ്യമാകുന്ന വെള്ളത്തെ സംരക്ഷിക്കാനുള്ള വഴികള്‍ ആരായണം. ചെളിയും പായലും കളഞ്ഞ് കുളങ്ങള്‍ വൃത്തിയാക്കുന്നതിനു പുറമെ അവ സംരക്ഷിക്കണം. തൊഴിലുറപ്പ് പദ്ധതിയില്‍ ഉള്‍പ്പെടുത്തി ഇവ നടപ്പാക്കാവുന്നതാണെന്നും ആശാ സനില്‍ പറഞ്ഞു.
കുളങ്ങളുടെ സംരക്ഷണം പ്രദേശവാസികളുടെ കൂടി ഉത്തരവാദിത്തമാകണമെന്ന് ജില്ലാ കളക്ടര്‍ കെ. മുഹമ്മദ് വൈ.സഫീറുള്ള പറഞ്ഞു. കുളങ്ങള്‍ വൃത്തിയാക്കുകയും നവീകരിക്കുകയും ചെയ്ത ശേഷം അവ സംരക്ഷിക്കാത്ത അനവധി ഉദാഹരണങ്ങളുണ്ട്. അതുകൊണ്ടു തന്നെ ജില്ലാ ഭരണകൂടത്തിന്റെ മാത്രം ചുമതലയാണിതെന്നു കരുതരുത്. 100 കുളങ്ങള്‍ 50 ദിവസത്തിനുള്ളില്‍ പുനരുജ്ജീവിപ്പിക്കാനുള്ള പദ്ധതിപ്രകാരം ഓരോ തദ്ദേശ സ്വയംഭരണസ്ഥാപനത്തിലെയും ഒരു കുളമെങ്കിലും തെരഞ്ഞെടുക്കാനാണ് ജില്ലാ ഭരണകൂടം ശ്രമിക്കുന്നത്. ഇത് ഒരു മാതൃകയാക്കി, തുടര്‍ന്ന് തദ്ദേശസ്വയംഭരണസ്ഥാപനങ്ങളും നാട്ടുകാരും ചേര്‍ന്ന് പ്രദേശത്തെ മറ്റ് ജലസ്രോതസ്സുകളും കൂടി വൃത്തിയാക്കണം. തദ്ദേശസ്വയംഭരണസ്ഥാപനങ്ങള്‍ക്കു പുറമെ സന്നദ്ധസംഘടനകള്‍, എന്‍എസ്എസ്, വിദ്യാര്‍ത്ഥികള്‍, യുവജനങ്ങള്‍, തുടങ്ങി എല്ലാവരെയും പങ്കാളികളാക്കാനാണ് ഉദ്ദേശിക്കുന്നത്. കുടിവെള്ള ലഭ്യത ഉറപ്പാക്കാനായിരിക്കും പ്രഥമ പരിഗണനയെന്നും കളക്ടര്‍ പറഞ്ഞു.
ഓരോ തദ്ദേശസ്വയംഭരണസ്ഥാപനത്തിലും ജല ഓഡിറ്റിങ്ങ് നടപ്പാക്കണമെന്നും അതത് പ്രദേശത്തെ ജല ആസ്തി കണ്ടെത്തണമെന്നും എസ്‌സിഎംഎസ് വാട്ടര്‍ ഇന്‍സ്റ്റിറ്റ്യൂട്ട് ഡയറക്ടര്‍ ഡോ. സണ്ണി ജോര്‍ജ് പറഞ്ഞു. തദ്ദേശസ്വയംഭരണസ്ഥാപനങ്ങള്‍ പ്രാദേശികമായ ജലനയം രൂപീകരിക്കണമെന്നും അദ്ദേഹം പറഞ്ഞു.
കൊച്ചിന്‍ഷിപ് യാര്‍ഡിന്റെ സാമൂഹ്യപ്രതിബദ്ധതാപദ്ധതിയിലുള്
ജില്ലയിലെ വിവിധ തദ്ദേശസ്വയംഭരണസ്ഥാപനങ്ങളിലെ ജനപ്രതിനിധികള്‍ യോഗത്തില്‍ പങ്കെടുത്തു. വിവിധ പ്രദേശങ്ങളില്‍ സംരക്ഷിക്കേണ്ട കുളങ്ങളുടെ വിവരങ്ങള്‍ അവര്‍ യോഗത്തില്‍ ഉന്നയിച്ചു. കുളം ശാസ്ത്രീയമായ രീതിയില്‍ വൃത്തിയാക്കണം. കുളങ്ങള്‍ക്കു ചുറ്റും സംരക്ഷണഭിത്തി കെട്ടണമെന്നും ജനപ്രതിനിധികള്‍ ആവശ്യപ്പെട്ടു.
ലോകജലദിനത്തില്‍ നടന്ന ചടങ്ങില്‍ ജല സംരക്ഷണം സംബന്ധിച്ച പ്രതിജ്ഞ പഞ്ചായത്ത് ഡെപ്യൂട്ടി ഡയറക്ടര്‍ എം എഫ് അബ്ദുള്‍ ജാവേദ് ചൊല്ലിക്കൊടുത്തു. പഞ്ചായത്ത് അസിസ്റ്റന്റ് ഡയറക്ടര്‍ ടിമ്പിള്‍ മാഗി സംസാരിച്ചു.
2016-17 വര്‍ഷത്തെ പദ്ധതിവിഹിതം ഉള്‍പ്പെടുത്തിയുള്ള പദ്ധതികള്‍ നൂറുശതമാനം പൂര്‍ത്തിയാക്കിയതിനുള്ള പ്രശംസാപത്രം ചടങ്ങില്‍ വാളകം ഗ്രാമപഞ്ചായത്ത് പ്രതിനിധികള്‍ക്ക് ജില്ലാ പഞ്ചായത്ത് പ്രസിഡണ്ട് ആശാ സനില്‍ കൈമാറി. പദ്ധതി വിഹിതം ചെലവഴിക്കുന്നതില്‍ രണ്ടാം സ്ഥാനത്തെത്തിയ മുളന്തുരുത്തി പഞ്ചായത്തിനും ജില്ലയില്‍ മുന്നിലെത്തിയ വാരപ്പട്ടി, തുറവൂര്‍, മഞ്ഞള്ളൂര്‍ പഞ്ചായത്തുകള്‍ക്കും പ്രശംസാപത്രം നല്കി.
Comments
Post a Comment