കൊച്ചി : വിജിലൻസിന്റെ പ്രവർത്തനങ്ങൾ എങ്ങനെ വേണമെന്ന് വ്യക്തമായ മാർഗനിർദേശം നൽകേണ്ട സമയം അതിക്രമിച്ചെന്നും ഇതിനായി ചീഫ് സെക്രട്ടറി, ആഭ്യന്തര വകുപ്പ് സെക്രട്ടറി തുടങ്ങിയവർ നിർദേശങ്ങൾ നൽകണമെന്നും ഹൈക്കോടതി നിർദേശിച്ചു.
ഇതിനായി ഉത്തരവിന്റെ പകർപ്പ് അഡ്വക്കേറ്റ് ജനറൽ, ചീഫ് സെക്രട്ടറി, ആഭ്യന്തര വകുപ്പു സെക്രട്ടറി, പ്രോസിക്യൂഷൻ ഡയറക്ടർ ജനറൽ തുടങ്ങിയവർക്ക് നൽകാനും ഉത്തരവിൽ പറയുന്നു. ഇ.പി. ജയരാജൻ മന്ത്രിയായിരിക്കെ തന്റെ ബന്ധുവായ പി.കെ. സുധീറിനെ കേരള സ്റ്റേറ്റ് ഇൻഡസ്ട്രിയൽ എന്റർപ്രൈസസ് ലിമിറ്റഡിന്റെ (കെ.എസ്.ഐ.ഇ) എം.ഡിയായി നിയമിച്ചതിനെതിരായ വിജിലൻസ് കേസിലാണ് സിംഗിൾബെഞ്ചിന്റെ വിമർശനം. ബന്ധുനിയമനത്തിന്റെ പേരിൽ വിജിലൻസ് രജിസ്റ്റർ ചെയ്ത കേസ് റദ്ദാക്കാൻ പി.കെ. സുധീർ നൽകിയ ഹർജിയിൽ ഹൈക്കോടതി വിജിലൻസിനോടു വിശദീകരണം തേടിയിരുന്നു. ഇതനുസരിച്ച് അന്വേഷണ ഉദ്യോഗസ്ഥൻ നൽകിയ മറുപടി തൃപ്തികരമല്ലെന്ന് ചൂണ്ടിക്കാട്ടിയാണ് ഹൈക്കോടതി വിജിലൻസിനെ വിമർശിച്ചത്.
വിവാദമായ നിയമനത്തിന്റെ പേരിൽ ആരും നേട്ടമുണ്ടാക്കിയില്ലെന്നും അഴിമതി നിരോധന നിയമപ്രകാരമുള്ള കുറ്റമില്ലെന്നും സർക്കാർ അഭിഭാഷകൻ വ്യക്തമാക്കിയിരുന്നു. എന്നാൽ ഇതിനു വിരുദ്ധമായാണ് വിജിലൻസ് ഉദ്യോഗസ്ഥൻ സ്റ്റേറ്റ്മെന്റ് നൽകിയത്. വിവാദ നിയമനത്തിലൂടെ ഹർജിക്കാരനോ മറ്റേതെങ്കിലും പ്രതിക്കോ നേട്ടമുണ്ടായോ എന്നതായിരുന്നു കോടതിയുടെ ചോദ്യം. വിജിലൻസ് കേസെടുക്കുന്നതിനു മുമ്പു തന്നെ റദ്ദാക്കിയ നിയമനത്തിലൂടെ ആർക്കാണ് നേട്ടമുണ്ടായതെന്ന ചോദ്യത്തിന് വിജിലൻസ് മറുപടി നൽകിയില്ല. മന്ത്രിയെന്ന നിലയിൽ ഇ.പി. ജയരാജൻ നടത്തിയ നിയമനത്തിന്റെ നിയമ സാധുതയും ലക്ഷ്യവും അന്വേഷിക്കുന്നുണ്ടെന്നാണ് സ്റ്റേറ്റ്മെന്റിൽ പറയുന്നത്. ഇക്കാര്യങ്ങൾ തീർപ്പാക്കാൻ ഭരണഘടന സ്ഥാപിതമായ അടിസ്ഥാനത്തിലുള്ള കോടതികളും ട്രൈബ്യൂണലുകളുമുണ്ട്. വിജിലൻസിന്റെ പരിധി വിട്ടുള്ള അന്വേഷണം അനുവദിക്കാനാവില്ല. സി.ബി.ഐ, എൻ.ഐ.എ എന്നിവയെപ്പോലെ വിജിലൻസ് പ്രത്യേക ഏജൻസിയല്ല. കേരള പൊലീസിന്റെ ഭാഗം മാത്രമാണ്. എൻ.ഐ.എ, സി.ബി.ഐ എന്നീ ഏജൻസികൾ പോലും ക്രിമിനൽ നടപടി ചട്ടമുൾപ്പടെയുള്ളവയുടെ അടിസ്ഥാനത്തിലാണ് പ്രവർത്തിക്കുന്നത്. ഈ സാഹചര്യത്തിൽ വിജിലൻസിന് രൂപം നൽകിയതിലുള്ള ആധികാരികതയും നിയമ സാധുതയും പരിശോധിക്കേണ്ടതുണ്ട്. ഇക്കാര്യം നാല് പൊലീസ് ഉദ്യോഗസ്ഥർക്ക് സ്ഥാനക്കയറ്റം നൽകിയതിനെതിരായ മറ്റൊരു ഹർജിയോടൊപ്പം പരിഗണിക്കാം. ബന്ധു നിയമനക്കേസിൽ കുറ്റം നിലനിൽക്കുന്നില്ലെന്ന് ഉത്തരവാദിത്വപ്പെട്ട സർക്കാർ അഭിഭാഷകൻ തന്നെ വ്യക്തമാക്കുമ്പോൾ എങ്ങനെയാണ് ഇതിനു വിരുദ്ധമായി സ്റ്റേറ്റ്മെന്റ് നൽകിയതെന്ന് അന്വേഷണ ഉദ്യോഗസ്ഥൻ വ്യക്തമാക്കണം. ഇത്തരത്തിൽ സ്റ്റേറ്റ്മെന്റ് നൽകാൻ എവിടെ നിന്ന് ആരാണ് നിർദേശിച്ചതെന്ന് വിശദീകരിക്കണം. കെ.എസ്.ഐ. ഇയിലെ എം.ഡി നിയമനത്തിന്റെ ചട്ടവും നടപടിക്രമങ്ങളും അന്വേഷണ ഉദ്യോഗസ്ഥൻ വ്യക്തമാക്കണം. വിജിലൻസ് രൂപീകരിക്കാനായുള്ള സർക്കാർ ഉത്തരവിന്റെ പകർപ്പ് പബ്ളിക് പ്രോസിക്യൂട്ടർ ഹാജരാക്കണം. മാർച്ച് 22 ന് രമേശ് ചെന്നിത്തലയുടെ ഹർജിക്കൊപ്പം പരിഗണിക്കാൻ മാറ്റി.
Comments
Post a Comment